Ensino Inglés para...

Na primeira sesión con Carlos falamos basicamente da situación de ensino das linguas estranxeiras. Deste xeito temos que falar dos distintos contextos de adquisición das linguas:

• Lingua inicial: primeira lingua que se aprende. É a lingua natal, o termo lingua materna resulta un pouco confuso, xa que non reflicte todo o abano de posibilidades (a nai pode non estar presente).
• Lingua segunda: adquirida despois da lingua inicial. É a lingua ambiental.
• Lingua estranxeira: non é nin a inicial nin a segunda. Adquírese no contexto escolar.

Ademáis do contexto de adquisición, existe o contexto de uso, é dicir, en qué situacións se usa cada lingua:

• Lingua habitual: utilizada na maioría dos contextos.
• Lingua de traballo: utilizada como medio de comunicación nunha empresa.
• Lingua vehicular: utilizada como medio de comunicación entre falantes de linguas diferentes.

Por outra banda temos o repertorio lingüístico, que é o conxunto de elementos lingüísticos coñecidos por un falante ou comunidade de falantes. Así temos a comunidade lingüística, que é a comunidade de falantes que comparten un mesmo repertorio lingüístico e a comunidade de lingua, que é a comunidade de falantes que comparten o coñecemento e o uso dunha lingua ou variedade lingüística.

No que se refire á didáctica das linguas temos como obxectivo enriquecer o repertorio lingüístico do alumnado e cohesionar unha comunidade lingüística. Os diferentes tipos son:

• Didáctica da lingua inicial (EMT: English as a Mother Tongue)
• Didáctica da lingua segunda (ESL: English as a Second Language)
• Didáctica da lingua estranxeira (EFL: English as a Foreign Language)

Hai que ter en conta todo isto, e ademáis como xa comentei nunha entrada anterior, hai que ter moi presente o que facemos en todo momento, xa que non é o mesmo ensinar unha lingua estranxeira en España ou en Eslovenia, por exemplo. Por certo, noutra entrada comentarei a miña experiencia coas linguas en Eslovenia.

Ata outra!